Молитва святому апостолу и Евангелисту Луке


Молитва

О святый Луко, Богом избранный и Материю Божиею благословенный, проповедниче по всей вселенней Евангелия Христова, мучениче и Апостоле, помощниче всем молитвенно призывающим тя! Помози и нам, непотребным рабом Господним, яко мы, по многим прегрешениям нашим, обретаемся во тьме и сени смертней, далече от Бога отстоя. Чрез то студом посрамлени, не имамы дерзновения молити Господа о прощении, призываем тя, великий светильниче Божий, яко пребывающаго в непреходящем Его свете: моли о нас Господа, да помилует нас. Умоли Бога, святый Апостоле, да обновит в нас страх Свой, любы привлекающ, грех же отгоняющ: яко тако навыкохом грех деяти на всяк день же и час, яко бы не ведающии слов Господних: «Бдите, яко не знаете часа, егда хощу приити», – Сей же может во всякий час призвати нас от сего привременнаго живота к жизни вечней. Молитвами твоими, о святый Луко, да пробудит Господь в нас страх и премудрость, о нихже святый царь и псалмопевец Давид рече, да улучим покаяния слезы, имиже души наша от греха очищени явятся: яко в духовней слепоте и дебелости суще, не можем плакатися своего мертвеца, сиречь самих себе, многи же слезы потребны, да пролием за множество содеянных нами грехов. Помози нам, да уразумеем истинная словеса и бежим греха, яко огня, и вся силы приложим, да приблизит ны Господь, да познаем, яко грех есть смерть, Бог же – Живот есть, и да молитвами твоими, святый Луко, познание сие от Бога приимше, очистимся греха и прейдем от смерти в живот; да будет нам Бог вся во всем, и во веки пребудем близ Него, да и нам, яко ти с Клеопою, сердце и душа трепетны будут от присутствия Его, и снидет на ны мир небесный, к Царствию Божию ны приводящий, и радость о Сем имуще, возможем стрелы лукаваго, в нас испускаемы, отгнати; с тем же да улучим и любы Божию, да руководит нас к вечному отечеству, идеже вся Силы Небесныя и вси святии пред Престолом Царя Славы предстоят с Богородицею, Еяже благий лик во иконе тобою написанней увековечен есть, да непрестанно взирающе на сию сердечныма очима, мир, и благодать, и веселие неизреченное стяжем и стопы наша направим на путь истинен, да достигнем Небеснаго Царствия, в кое чаем молитвами твоими, Апостоле Христов, преселитися, егда нас Господь призовет, да тамо вечно славим Бога во Святей Троице: Безначальнаго Отца со Единородным Его Сыном и Пресвятым и Животворящим Его Духом, в безконечныя веки. Аминь.

Молитвенная Помощь
Цитата дня
× Цитата дня
Кто перед другими обличает согрешившего или с пристрастием говорит о каком-то человеке, тот движим духом не Божиим, но иным.
преподобный Паисий Святогорец