Акафист святому апостолу и Евангелисту Луке

Кондак 1

Премудрым Промыслом Божиим избранный благовестити светлость Христова Евангелия всему миру, Луко всеблаженне, велие дерзновение имаши пред Господем, Егоже земный живот и учение списал еси, испроси и нам, немощным, прощение прегрешений и утверди в нас надежду Царствия Небеснаго, да возможем ти всерадостно взывати: Радуйся, святый Луко, Евангелисте Христов и Апостоле.

Икос 1

Всемилостивый Господь во гресе погибающему роду человеческому посла Сына Своего, да изведет род сей из тьмы и направит к жизни вечней животом, смертию и славным воскресением Своим. Тобою же, Евангелисте святый, начертаны суть тайны небесе и земли, да вси человецы, внемлюще словесем благовестия твоего, преуспевают в стяжании благодати Христовы и, благодарни суще, воспевают тебе сице:Радуйся, Духом Святым на списание Евангелия просвещенный.Радуйся, Феофилу достопочтенному и всем нам бисер драгий Евангелия Христова обретый.Радуйся, яко Богом избран был еси возвестити тайну спасения.Радуйся, провозвестниче Благия Вести.Радуйся, яко Христа, пришедшаго грешныя спасти, проповедавый.Радуйся, в тайны Божия духом вознесыйся.Радуйся, яко пророчеств исполнение благовестил еси.Радуйся, яко Дух Святый тобою Евангелие в мир излия.Радуйся, яко словеса твоя просветиша вселенную.Радуйся, яко мрежею Евангелия мнози души словесне Христу уловил еси.Радуйся, яко жертвенную любовь Божию к роду человеческому возвестил еси.Радуйся, звезло, в Церкви Небесней сияющая.Радуйся, святый Луко, Евангелисте Христов и Апостоле.

Кондак 2

В младости твоей возжелавше мирския мудрости, Луко премудрый, ту познал еси; пришедше же во Иерусалим из Антиохии, егда Господь Иисус Христос Свое Божественное слово сеял на земли, ты сердцем своим доброе семя восприял еси, исполнившеся же небесныя радости, воспел еси велегласно Богочеловеку Христу: Аллилуиа.

Икос 2

Зерно Божественныя любве стократный плод у тебе прозябе: ты бо учение Господне послушав и чудеса Его видев, исполнился еси Божественныя мудрости и ведения, коих еллинския и египетския училища дати ти тщетны быша. Сего ради избра тя Господь и прочих седмьдесят Апостол и посла, да проповедите Благую Весть спасения рода человеча. Мы же чрез Святое Евангелие, тобою списанное, и доныне пия Божию премудрость, воспеваем ти тако:Радуйся, Христовою благодатию в сердце уязвленный.Радуйся, яко Божественная премудрость бе ти вместо мирскаго суемудрия, емуже обучен был еси.Радуйся, яко оставивши вся, за Христом последовал еси.Радуйся, вестниче Господень предивный.Радуйся, ревностный проповедниче веры Христовы.Радуйся, самовидче Слова, Егоже чаяше языцы.Радуйся, родословная Христова до Адама возведый.Радуйся, Владычицы икону написавый.Радуйся, Иисуса Христа Сына Божия и Сына Человеческаго во единем лице проповедавый.Радуйся, неутомимый провозвестниче Истины Христовы.Радуйся, искусный ловителю душ человеческих.Радуйся, сеятелю добраго семене, стократы плод приносящаго.Радуйся, святый Луко, Евангелисте Христов и Апостоле.

Кондак 3

Вооруженный от Господа силою и властию, святый Луко, проповедати Евангелие и творити чудеса, с прочими Апостолами шествовал еси пред лицем Господа Иисуса Христа, уготовляя путь Ему и проповедуя людем, яко пришел есть в мир от века обетованный Мессия, Коему вси яко Богу от ныне и до века да взывают: Аллилуиа.

Икос 3

Во святыя и страшныя дни честных и славных страстей Господа нашего Иисуса Христа, егда неправедныя судии Судию Праведнаго осудиша и на Кресте Живодавца распяша, ты, святый Луко, во Иерусалим пришел еси, со слезами взирая, како Кровь Агнча изливашеся. Темже ныне, страданьми Того искупленнии, умильно вопием ти:Радуйся, спасительнаго подвига Христова списателю.Радуйся, верный слуго Всецаря Христа.Радуйся, кимвале громогласный, славу Божию возвещающий.Радуйся, лучу небесный, во тьме мира сего путь к Богу освещающий.Радуйся, противу врага, в Иуду вшедшаго, нас вооруживый.Радуйся, милосердие Господне в исцелении раба, емуже Петр ухо усече, нам показавый.Радуйся, кладезю, из негоже водою благовестия Христова напояемся.Радуйся, яко радостно и без страха словеса Божия людем приносивый.Радуйся, сердца обрезание прияти паче плотскаго обрезания возжелавый.Радуйся, доброе гроздие винограда Господня.Радуйся, яко лицем к лицу Христа Бога узревый.Радуйся, яко Господа и ныне в Царствии Небеснем видеши.Радуйся, святый Луко, Евангелисте Христов и Апостоле.

Кондак 4

Печаль твоя претворися в радость, богоубийц же радость обратися в печаль: яко не имать власти смерть над Источником Живота, и камень гробный не возможе удержати Камене краеугольнаго: Господь твой воскресе из мертвых и мирови дарова живот вечный; ты же с братиею в радости велицей восклицал еси: Аллилуиа.

Икос 4

Егда по воскресении с Клеопою идоша в ближний Еммаус, явися вам Христос и идяше с вами: и бысть вам сердца горяща и души трепетны, егда поучаше вас о Себе от пророк и Писаний; вы же Господа не познаша, дондеже на трапезе вечери Той преломи хлеб и благослови: и отверзошася очи ваша, и уразумеша вы, яко воскресе Господь. О сем из Писания уведевше, и наши души притрепетны суть. Сего ради с веселием воспеваем ти:Радуйся, воскресение Христово видевый.Радуйся, от несмысленности к богомудренности Христом приведенный.Радуйся, яко Христос отверз ти разум разумети Писания.Радуйся, яко бе ти сердце горяще, егда во Еммаус со Клеопою идя, поучастася глаголом Христовым.Радуйся, яко хлеб, рукама Христовыма преломленный, от Него приял еси.Радуйся, яко Христос словеса ваша о явлении Его на пути в Еммаус, паки явившеся учеником, запечатлел еси.Радуйся, яко сам испив чашу премудрости Божия, многих познанием Истины Христовы напояеши.Радуйся, воскресение Христово языком проповедавый.Радуйся, Источник спасения нам указавый.Радуйся, яко Путеводительницы к Жизни образ нам преподал еси.Радуйся, светлосте разумнаго Солнца.Радуйся, научивый нас веровати во Святую Троицу.Радуйся, святый Луко, Евангелисте Христов и Апостоле.

Кондак 5

Егда воскресый Господь, спасения нашего ради, основа Церковь Свою и, по обетованию, низпосла в день пятидесятый, по воскресении, Духа Святаго на Апостолы, во еже запечатлети их свидетели непоколебимы веры христианския, тогда и ты, святый Луко, пребывал еси во Иерусалиме, купно со инеми Апостолы верно свидетельствуя Богочеловека Христа и воспевая Ему яко Истинному Богу: Аллилуиа.

Икос 5

Послежде во отечество твое Антиохию последовал еси, святый Луко, еже бысть страна, многими христианы населенна, но в Севастии, идеже нетленныя мощи святаго Иоанна Предтечи почиваша, умедлил еси, проповедуя тамо Евангелие спасення. Узрев же святыя мощи, возжелал еси с собою я понести; христиане же Севастийстии не восхотевше лишитися честныя святыни, и тако вручиша ти десницу Иоаннову, под нюже Сам Господь приклони Божественную главу во Крещении: ту же ты радостно понесл еси. Мы же, дивящеся твоей любви ко святым, восклицаем ти таковая:Радуйся, свидетелю снизхождения Духа Святаго.Радуйся, яко Церкви устроение списал еси нам.Радуйся, яко себе росою небесною явил еси и мир просветил еси.Радуйся, яко Духом Святым Новый Завет начертася на сердце твоем.Радуйся, Духа Святаго наитием миру изъяснивый Божественную истину.Радуйся, Господа всех мирови благовестивый.Радуйся, Закхея, сребролюбием уязвленнаго, очистившагося показавый.Радуйся, от Бога избранный таинниче.Радуйся, яко сердце свое очистил еси светлостию Духа Святаго.Радуйся, яко предстательство Предтечи обрел еси.Радуйся, благочестиваго употребления вещей освященных начинателю.Радуйся, заступниче наш пред Престолом Всевышняго.Радуйся, святый Луко, Евангелисте Христов и Апостоле.

Кондак 6

Десницу Иоаннову, аки безценное сокровище прияв, достигл еси своего отечества к велицей радости христиан Антиохийских, коих в словесах Божественных и радости Христова Евангелия утвердил еси, глаголаше им Сына Божия чудеса, яже своима очима видел еси, и учение Спасителя мира, еже своима ушима слышал еси. Темже и мы, твоими глоголами наставляеми, воспеваем с радостию Богу: Аллилуиа.

Икос 6

Пребывал еси, Луко преславне, во Антиохии, дондеже Апостол Павел призва тя, да будеши ему сотрудник и сопутник на стезях Божиих. Егдаже вы в страну Еллинску на проповедь Евангелия шествовали есте, Павел святый остави тя в Филиппех, да утвердиши и умножиши Церковь в стране Македонстей, идеже ты до времене пребыл еси, проповедуя тамо истину Христову. Дивящеся убо таковым трудам твоим, взываем ти:Радуйся, неутомимый сопутниче Апостола Павла.Радуйся, с Павлом премудрым избранный учителем языков.Радуйся, яко неизреченно просвещаеши всю вселенную.Радуйся, всех уязвленных утешителю.Радуйся, врачу, силою Вышняго Врача исцеление подающий.Радуйся, в Евангелии от смертоноснаго древа свобождение нам возвещающий.Радуйся, служение имением аки похвальное показующий.Радуйся, Марии, Иоанны, Сусанны и прочих благоразумия и несребролюбия возвестителю.Радуйся, Иосифа Аримафейскаго похвалителю.Радуйся, яко уныние из сердец наших изгоняеши.Радуйся, молитвенниче наш пред Богом.Радуйся, яко многих ко светлости Живота призвал еси.Радуйся, святый Луко, Евангелисте Христов и Апостоле.

Кондак 7

Егда святый Павел паки в Филиппы пришед, в Коринф ти, Луко всехвальне, идти заповеда, да приимеши милостыню христианом, в Палестине сущим. Совершив же сие, с великим Апостолом неотступно пребывал есия, воспевая купно с ним Всемогущему Богу: Аллилуиа.

Икос 7

Обходя вся Церкви в Асии и Иудеи, достигоста святыя Апостолы града Кесарийскаго в Палестине, идеже иудеи римским властем святаго Павла предаша, да оковами обложен будет. Ты же, Луко всехвальне, неотступно с ним пребывал еси, многия беды претерпевающе на море и на земли. Сего ради, восхваляюще тя, поем сицевая:Радуйся, Павлов помощниче в служении.Радуйся, того проповедание нам изложивый.Радуйся, врачу милостивый и человеколюбивый.Радуйся, колоссаев чрез Павла святаго во узах приветствовавый.Радуйся, словом и Писанием Христа свидетельствовавый.Радуйся, яко негодную безбожия соль Божественною солию осоливый.Радуйся, стрело благочестия Христова. Радуйся, трубо Божественныя благодати. Радуйся, яко напояеши нас Евангелием Христовым.Радуйся, таин неизреченных проповедниче.Радуйся, всех немощных укрепление.Радуйся, от демонов избавителю.Радуйся, святый Луко, Евангелисте Христов и Апостоле.

Кондак 8

Достигнув Рима, купно со Апостолами Павлом, Марком, Аристархом и иными спутешественниками твоими, евреом первее Христа проповедал еси; не верующим же им словеси вашему и распри между собою имущим, идосте ко всем не ведущим Бога, кои, услышав словеса спасения и Духом Святым просвещеннии, радостно воспеша Воплотившемуся Христу Господу: Аллилуиа.

Икос 8

Во время оно, в Риме ты, святый Луко, соверши деяния, на яже от Бога избран бых: состави Святое Евангелие, в немже начертал еси живот и род Христов, яко сам видех и слышах, и яко от самовидцев и слуг Слова приял еси; словеса же Апостола Павла слышав – деяния Апостольская списал еси. Не вемы, како тя инии восхваляют, мы же приносим ти таковая:Радуйся, Духом Святым запечатленный.Радуйся, неизреченным тайнам от Христа наученный.Радуйся, догматов церковных вразумителю.Радуйся, яко рукою Владычнею вышним ведением обогащен еси.Радуйся, яко от Апостола Павла многия тайны Христовы слышал еси.Радуйся, Апостола языков сотрудниче неутомимый.Радуйся, яко рукою Владычнею высшим ведением обогащен еси.Радуйся, яко от Апостола Павла многия тайны Христовы слышал еси.Радуйся, яко весь мир Божественною благодатию просветил еси.Радуйся, яко твое благовестие пройде по всей земли.Радуйся, яко вином Божией премудрости сердца наша увеселил еси.Радуйся, яко ты един благоразумнаго разбойника покаяние в Евангелии списал еси.Радуйся, богатство стяжавшим благоразумие мытаря приведый.Радуйся, самарянина милосердие показавый.Радуйся, святый Луко, Евангелисте Христов и Апостоле.

Кондак 9

Егда Апостол Павел по узах двухлетних отпущен бе и потече из Рима обойти прежде основанныя Церкви, ты, Луко преславный, его верный спутник в том пути обретохся; егда же гонение на христиан в Риме Нерон нечестивый воздвиже – возвратистася вы, во еже ободрити и укрепити Церковь гониму, и во узах воспевающую Богу: Аллилуиа.

Икос 9

Егда Павла нечестивии связаша и в оковы заключиша, ты, святый Луко, верно и неотступно с ним пребывал еси; егда же наставник твой мученически предаваше чистую свою душу Господу – со слезами при нем стоял еси. Мы же ныне соскорбяще болезни твоей, велегласно взываем:Радуйся, яко единый Апостола Павла во узах не оставил еси.Радуйся, яко мученическую кончину великаго Павла узрел еси.Радуйся, от Троады до врат райских Павлу последовавый.Радуйся, богомудрым Павлом изрядно наставленный.Радуйся, деяний Апостольских изложителю.Радуйся, Церкви Божия светильниче.Радуйся, яко блистанием твоего духа сердца верных просвещаеши.Радуйся, яко лесть демонскую теплотою веры отгоняеши.Радуйся, яко Господь тобою многая добродетели учини.Радуйся, ризнице, дарований небесных исполненная.Радуйся, благочестия непоколебимый столпе.Радуйся, яко имя твое святое вси роди христианстии почитают.Радуйся, святый Луко, Евангелисте Христов и Апостоле.

Кондак 10

Апостолу языков мученически скончавшуся, во странах Италийский, Далматский и Гальский проповедал еси Христа, паче же в Македонии и Ахаии потрудился еси, всюду мрак безбожия разгоняя и языки научая, да вси Богу Живому и Истинному воспевают: Аллилуиа.

Икос 10

Егда состарехся, всехвальне Луко, во Египет востекл еси, да проповедуеши Благую Весть спасения Христова. Благовествуя тамо, многия мучения претерпел еси и множество подвигов подъял еси. Возвращшеся же в страну Еллинску, устроения Церкви Христовы ради, много тамо потрудился еси, священники со диаконы рукополагая, болящия телом и душею исцеляя и наставляя. Темже, благодарни суще, радостно воспеваем ти сице:Радуйся, яко Тело Христово – Церковь Святую устроял еси.Радуйся, заре новаго дне, еже есть Христос.Радуйся, писанием Евангельским путь к Небеси нам показующий.Радуйся, древо доброе, многия плоды принесшее.Радуйся, мзду за Весть Благую в Царствии Небеснем восприемый.Радуйся, обличителю безбожия, очи духовныя к Истине отверзающий.Радуйся, Божиих преславных чудес проповедниче.Радуйся, закон Христов ясно нам изложивый.Радуйся, на подвиг деятельныя любве нас подвигнувый.Радуйся, яко из уст твоих боготочныя воды Христова благовестия истекоша.Радуйся, проповедию твоею, яко солнце сияющий.Радуйся, яко иконы твоя очи верных к Солнцу Правды возводят.Радуйся, святый Луко, Евангелисте Христов и Апостоле.

Кондак 11

Бе же ти, Луко блаженне, осмьдесят лет и четыре, егда злобнии идолопоклонницы связаша тя, и, биюще Христа Господа ради, повесиша тя на масличноем древе в Фивах Беотийских. Ты же, радуяся, в руце Господни душу твою предал еси, и ныне, Престолу Божию предстоя, со Ангелы купно воспеваеши Царю всея твари: Аллилуиа.

Икос 11

Многия болящии исцеления прияша от священных мощей твоих, Луко святый; сего ради Констанций царь, слышав сие, с торжеством в Царьград их пренесе. Един же от евнух, зле болящий, уведев о том, повеле ся на ложе к раце твоих мощей принести: и с твердою верою тоя прикоснувся – в той же час здравие обрет. Возрадовавшуся же ему о таковей милости Божией, чрез тя истекшей, понесе твоя мощи, ко храму, идеже оныя под Святою Трапезою положени быша купно с мощами святых Апостол Андрея и Тимофея. Мы же таковому чудеси дивящеся, взываем ти сице:Радуйся, венцем мученическим увенчанный.Радуйся, яко твоею мученическою кровию Церковь Христова утвердися.Радуйся, врачу, от истления Христом добре уврачевавыйся.Радуйся, сам себе в жертву благоуханную за Благую Весть принесый.Радуйся, яко многия поругания за Христа восприявый.Радуйся, яко мученичеством веру во Христа засвидетельствовавый.Радуйся, яко и в старости приял еси от Господа силы свидетельствовати о Нем даже до крове.Радуйся, яко течение доброе страданьми твоими запечатлел еси.Радуйся, яко верен слуга Христа Бога явился еси.Радуйся, яко тя и земная, и небесная Церковь славит.Радуйся, персте Духа Святаго.Радуйся, яко радуешися купно со святыми в Царствии Небеснем.Радуйся, святый Луко, Евангелисте Христов и Апостоле.

Кондак 12

Купно со словесным Евангелием, святый Луко, Евангелие во иконех оставил еси нам: яко христианом дний тех изволившим, живописа образы преблагаго лика Матери Божией, рекшей: «Благодать Рождшагося от Мене и Моя милость с сими иконами да пребудут». Темже и мы, благоговейно взирающе на честный лик Девы и Сына Ея, с радостию и благодарением Премудрому Господу взываем: Аллилуиа.

Икос 12

Живописавшу тебе, святый Луко, честную икону Божия Матери, на дске икону святых Апостол Петра и Павла изобразил еси, начаток писания святых икон во славу Божию, Пресвятыя Богородицы и всех святых тем полагая, кои и до сего дне благолепно храмы Божия украшают и ко спасению всех благоговейно их почитающих призывают. Сего ради за сие, дарованное нам тобою, благодарни суще, воспеваем ти:Радуйся, Евангельских таин благовестителю.Радуйся, весь род человеческий, чающий Спасителя, просветивый.Радуйся, Матерь Божию на иконе изобразивый.Радуйся, яко благословение от Нея приял еси.Радуйся, Девы лик увековечивый.Радуйся, яко неизреченную радость тем в сердца наша принесый.Радуйся, яко и доныне Царица Небесная от икон Своих, ихже писанию начало ты положил еси, многая чудеса верным Своим изливает.Радуйся, яко благий лик Ея, тобою изображенный, уныние от нас отгоняет.Радуйся, от Владычицы уведевый словеса Господни, яже сложена быша в сердце Ея.Радуйся, Матерь Божию в благовестии твоем возвеличивый.Радуйся, яко Мати Божия поведа ти Архангельское Ей благовестие.Радуйся, Пречистою Богородительницею благословенный.Радуйся, святый Луко, Евангелисте Христов и Апостоле.

Кондак 13

О святый Евангелисте и Апостоле Луко, приими сия немощная наша словеса, яко молитву богоприятну, и испроси нам у Господа нашего Иисуса Христа, Емуже неустанно послужил еси и велию милость от Него восприял еси, прощение всех согрешений наших, мирен и безболезнен конец живота и преселение невозбранное в обители вечныя, идеже вси святии воспевают небесную песнь Богу: Аллилуиа.